palkon pe le ke bojh kahan tak phira karun

palkoñ pe le ke bojh kahāñ tak phirā karūñ

ai ḳhvāb-e-rā.egāñ maiñ batā terā kyā karūñ

vo hai ba-zid usī pe ki maiñ iltijā karūñ

kuchh to batā ai merī anā ab maiñ kyā karūñ

paane kī jidd-o-johd meñ umreñ guzar ga.iiñ

ik baar tujh ko khone kā bhī hausla karūñ

har aane vaalā bazm meñ terī hai mohtaram

tāzīm ko maiñ sab kī kahāñ tak uThā karūñ

har ik varaq hai tujh se shurūa is kitāb kā

tū hī batā kahāñ se maiñ ab ibtidā karūñ

hai zer-e-ġhaur apnī hī chāhat kā ehtisāb

terī vafā pe kyā maiñ abhī tabsira karūñ

palkon pe le ke bojh kahan tak phira karun

ai KHwab-e-raegan main bata tera kya karun

wo hai ba-zid usi pe ki main iltija karun

kuchh to bata ai meri ana ab main kya karun

pane ki jidd-o-johd mein umren guzar gain

ek bar tujh ko khone ka bhi hausla karun

har aane wala bazm mein teri hai mohtaram

tazim ko main sab ki kahan tak uTha karun

har ek waraq hai tujh se shurua is kitab ka

tu hi bata kahan se main ab ibtida karun

hai zer-e-ghaur apni hi chahat ka ehtisab

teri wafa pe kya main abhi tabsira karun