palkon pe saj rahe hain jo moti na roliye

palkoñ pe saj rahe haiñ jo motī na roliye

jauhar haiñ ġham ke ġham ke tarāzū meñ toliye

shām-e-ġham-e-firāq ke pahlū meñ baiTh kar

aa.ī kisī kī yaad to chupke se ro liye

mūñdī ga.iiñ jo āñkheñ to aa.e vo dekhne

aa kar bhī kah na paa.e ki āñkheñ to kholiye

dekhā jo qadr ġham kī nahīñ hai jahān meñ

le kar vo biij dil meñ mohabbat se bo liye

jaage hue the ham jo tamannā ke baab meñ

sub.h-e-murād pā ke achānak hī so liye

likkhā huā thā kal bhī vafā ke mazār par

aa.e ho dar pe dil ke to haule se kholiye

dekhā jo dil ko chup to vafāoñ ne ye kahā

itnī tavīl shab hai are kuchh to boliye

palkon pe saj rahe hain jo moti na roliye

jauhar hain gham ke gham ke taraazu mein toliye

sham-e-gham-e-firaq ke pahlu mein baiTh kar

aai kisi ki yaad to chupke se ro liye

mundi gain jo aankhen to aae wo dekhne

aa kar bhi kah na pae ki aankhen to kholiye

dekha jo qadr gham ki nahin hai jahan mein

le kar wo bij dil mein mohabbat se bo liye

jage hue the hum jo tamanna ke bab mein

subh-e-murad pa ke achanak hi so liye

likkha hua tha kal bhi wafa ke mazar par

aae ho dar pe dil ke to haule se kholiye

dekha jo dil ko chup to wafaon ne ye kaha

itni tawil shab hai are kuchh to boliye