parda chehre se haTae to ghazal ho jae

parda chehre se haTā.e to ġhazal ho jaa.e

zindagī sāmne aa.e to ġhazal ho jaa.e

sard saḌkoñ pe sisakte hue sannāToñ kā

dard jab dil meñ samā.e to ġhazal ho jaa.e

soz har lafz ke siine meñ nihāñ hai ab bhī

ḳhāmushī saaz uThā.e to ġhazal ho jaa.e

shahr-e-ehsās agar narm lab-o-lahje meñ

dāstāñ apnī sunā.e to ġhazal ho jaa.e

din ke hangāmoñ meñ gum-karda har ik fikr mirī

shab kī āġhosh meñ aa.e to ġhazal ho jaa.e

kab se baiThā huuñ ḳhayālāt kā ḳhema taane

karb-e-taḳhlīq satā.e to ġhazal ho jaa.e

shām-e-ġham jām-ba-kaf hai to is 'ālam meñ 'ḳhayāl'

hosh bhī haath milā.e to ġhazal ho jaa.e

parda chehre se haTae to ghazal ho jae

zindagi samne aae to ghazal ho jae

sard saDkon pe sisakte hue sannaTon ka

dard jab dil mein samae to ghazal ho jae

soz har lafz ke sine mein nihan hai ab bhi

KHamushi saz uThae to ghazal ho jae

shahr-e-ehsas agar narm lab-o-lahje mein

dastan apni sunae to ghazal ho jae

din ke hangamon mein gum-karda har ek fikr meri

shab ki aaghosh mein aae to ghazal ho jae

kab se baiTha hun KHayalat ka KHema tane

karb-e-taKHliq satae to ghazal ho jae

sham-e-gham jam-ba-kaf hai to is 'alam mein 'KHayal'

hosh bhi hath milae to ghazal ho jae