parde harim-e-dil ke uThae hue se hain

parde harīm-e-dil ke uThā.e hue se haiñ

ab ḳhud vo mere sāmne aa.e hue se haiñ

kyā lutf hai ki aap hoñ apne se be-ḳhabar

mujh ko vo ḳhud mujhī se chhupā.e hue se haiñ

'ālam tamām 'aks hai un ke jamāl kā

jalve ye sab unhīñ ke dikhā.e hue se haiñ

īmān ho ki jaan hameñ is se bahs kyā

har kā.enāt un pe luTā.e hue se haiñ

vāraftagān-e-'ishq kī vāraftagī na pūchh

behosh ho ke hosh meñ aa.e hue se haiñ

allah re un ke husn kī ḳhātir-farebiyāñ

dīvāna apnā sab ko banā.e hue se haiñ

bahr-e-du’ā uThā.eñ vo ab haath kis liye

jo zindagī se haath uThā.e hue se haiñ

rahmat ḳhudā kī tujh pe ho ai 'ishq-e-ḳhud-fareb

ham bhī tire fareb meñ aa.e hue se haiñ

chupke hī chupke maar rahe haiñ diloñ pe tiir

zāhir meñ jo nigāh jhukā.e hue se haiñ

ai justujū-e-yār ye kyā haal kar diyā

kho.e hue se ham haiñ na paa.e hue se haiñ

un ke diloñ ke dard kā ab pūchhnā hī kyā

jo ḳhud hī dil ko dard banā.e hue se haiñ

āġhosh-e-shauq donoñ taraf se hai vā 'junūñ'

vo ham meñ aur ham un meñ samā.e hue se haiñ

parde harim-e-dil ke uThae hue se hain

ab KHud wo mere samne aae hue se hain

kya lutf hai ki aap hon apne se be-KHabar

mujh ko wo KHud mujhi se chhupae hue se hain

'alam tamam 'aks hai un ke jamal ka

jalwe ye sab unhin ke dikhae hue se hain

iman ho ki jaan hamein is se bahs kya

har kaenat un pe luTae hue se hain

waraftagan-e-'ishq ki waraftagi na puchh

behosh ho ke hosh mein aae hue se hain

allah re un ke husn ki KHatir-farebiyan

diwana apna sab ko banae hue se hain

bahr-e-du’a uThaen wo ab hath kis liye

jo zindagi se hath uThae hue se hain

rahmat KHuda ki tujh pe ho ai 'ishq-e-KHud-fareb

hum bhi tere fareb mein aae hue se hain

chupke hi chupke mar rahe hain dilon pe tir

zahir mein jo nigah jhukae hue se hain

ai justuju-e-yar ye kya haal kar diya

khoe hue se hum hain na pae hue se hain

un ke dilon ke dard ka ab puchhna hi kya

jo KHud hi dil ko dard banae hue se hain

aaghosh-e-shauq donon taraf se hai wa 'junun'

wo hum mein aur hum un mein samae hue se hain