parde mein is badan ke chhupen raaz kis tarah

parde meñ is badan ke chhupeñ raaz kis tarah

ḳhushbū na hogī phuul kī ġhammāz kis tarah

tarz-e-kalām un kā huā tarz-e-ḳhās-o-ām

badleñge ab vo baat kā andāz kis tarah

badlā jo us kī aañkh kā andāz to khulā

karte haiñ rañg phuul se parvāz kis tarah

āñkhoñ meñ kaise tan ga.ī dīvār-e-be-hisī

sīnoñ meñ ghuT ke rah ga.ī āvāz kis tarah

vo haq-parast kaise hue maslahat-parast

naġhmoñ se be-libās hue saaz kis tarah

āñkhoñ meñ mom Daal ke baiTheñge kab talak

ā.īnoñ se chhupā.eñge ye raaz kis tarah

us kī nazar meñ aks-e-ta.alluq kahīñ nahīñ

'amjad' hadīs-e-shauq ho āġhāz kis tarah

parde mein is badan ke chhupen raaz kis tarah

KHushbu na hogi phul ki ghammaz kis tarah

tarz-e-kalam un ka hua tarz-e-KHas-o-am

badlenge ab wo baat ka andaz kis tarah

badla jo us ki aankh ka andaz to khula

karte hain rang phul se parwaz kis tarah

aankhon mein kaise tan gai diwar-e-be-hisi

sinon mein ghuT ke rah gai aawaz kis tarah

wo haq-parast kaise hue maslahat-parast

naghmon se be-libas hue saz kis tarah

aankhon mein mom Dal ke baiThenge kab talak

aainon se chhupaenge ye raaz kis tarah

us ki nazar mein aks-e-talluq kahin nahin

'amjad' hadis-e-shauq ho aaghaz kis tarah