parinde hum ko peDon par dikhai kyon nahin dete

parinde ham ko peḌoñ par dikhā.ī kyoñ nahīñ dete

kisī bhī shāḳh par ab ghar dikhā.ī kyoñ nahīñ dete

na titlī hai na shabnam hai na kaliyāñ haiñ na ġhunche haiñ

bahāroñ ke bhalā manzar dikhā.ī kyoñ nahīñ dete

sitāre so rahe haiñ āsmāñ ko god meñ thak kar

mujhe ab chāñd ke manzar dikhā.ī kyoñ nahīñ dete

jahāñ amn-o-amāñ kī deviyāñ āvāz detī thiiñ

ab aise ḳhūb-rū mandir dikhā.ī kyoñ nahīñ dete

sharāfat faḳhr-e-insāñ thī kabhī īmān-o-rāhat thī

zamāne meñ ye ab jauhar dikhā.ī kyoñ nahīñ dete

piyāle kyoñ mire hoñToñ tak aa kar TuuT jaate haiñ

rasīle ab yahāñ sāġhar dikhā.ī kyoñ nahīñ dete

riyā-kārī hai kyoñ sheva hamāre dostoñ kā ab

mohabbat ke yahāñ gauhar dikhā.ī kyoñ nahīñ dete

jahāñ insān kī insān se ho dostī 'gulshan'

kisī bhī samt aise dar dikhā.ī kyoñ nahīñ dete

parinde hum ko peDon par dikhai kyon nahin dete

kisi bhi shaKH par ab ghar dikhai kyon nahin dete

na titli hai na shabnam hai na kaliyan hain na ghunche hain

bahaaron ke bhala manzar dikhai kyon nahin dete

sitare so rahe hain aasman ko god mein thak kar

mujhe ab chand ke manzar dikhai kyon nahin dete

jahan amn-o-aman ki dewiyan aawaz deti thin

ab aise KHub-ru mandir dikhai kyon nahin dete

sharafat faKHr-e-insan thi kabhi iman-o-rahat thi

zamane mein ye ab jauhar dikhai kyon nahin dete

piyale kyon mere honTon tak aa kar TuT jate hain

rasile ab yahan saghar dikhai kyon nahin dete

riya-kari hai kyon shewa hamare doston ka ab

mohabbat ke yahan gauhar dikhai kyon nahin dete

jahan insan ki insan se ho dosti 'gulshan'

kisi bhi samt aise dar dikhai kyon nahin dete