parinde phul jugnu chand tare raqs karte hain

parinde phuul jugnū chāñd taare raqs karte haiñ

jahāñ tum raqs kartī ho nazāre raqs karte haiñ

kahīñ jab zikr aatā hai tumhārā mere she'roñ meñ

qalam kī nok par alfāz saare raqs karte haiñ

havā jab tum ko chhū kar aag se kartī hai aThkhelī

chaTaḳhte khilkhilāte haiñ sharāre raqs karte haiñ

kabhī jab tum ko chhū kar buuñd girtī hai samundar meñ

gale lahroñ se milte haiñ kināre raqs karte haiñ

bachāyā thā mujhe girne se tum ne jis jagah ab bhī

añdhere-muñh vahāñ aa kar sahāre raqs karte haiñ

mujhe taqdīr ne lā kar jahāñ tum se milāyā thā

vahāñ ab bhī muqaddar ke sitāre raqs karte haiñ

tumhārī aañkh se kartī hai merī aañkh jab bāteñ

ishāroñ se lipaTte haiñ ishāre raqs karte haiñ

tumhāre husn kā hotā hai jab bhī tazkira jānāñ

misāleñ jhūmtī haiñ isti'āre raqs karte haiñ

tumheñ chhū kar agar bādal bane ik buuñd paanī bhī

sañvartī hai dhanak rangīn dhāre raqs karte haiñ

tumhāre naam ke pahlū meñ jab likhtā huuñ maiñ 'āsim'

utarte hī varaq par harf saare raqs karte haiñ

parinde phul jugnu chand tare raqs karte hain

jahan tum raqs karti ho nazare raqs karte hain

kahin jab zikr aata hai tumhaara mere she'ron mein

qalam ki nok par alfaz sare raqs karte hain

hawa jab tum ko chhu kar aag se karti hai aThkheli

chaTaKHte khilkhilate hain sharare raqs karte hain

kabhi jab tum ko chhu kar bund girti hai samundar mein

gale lahron se milte hain kinare raqs karte hain

bachaya tha mujhe girne se tum ne jis jagah ab bhi

andhere-munh wahan aa kar sahaare raqs karte hain

mujhe taqdir ne la kar jahan tum se milaya tha

wahan ab bhi muqaddar ke sitare raqs karte hain

tumhaari aankh se karti hai meri aankh jab baaten

ishaaron se lipaTte hain ishaare raqs karte hain

tumhaare husn ka hota hai jab bhi tazkira jaanan

misalen jhumti hain isti'are raqs karte hain

tumhein chhu kar agar baadal bane ek bund pani bhi

sanwarti hai dhanak rangin dhaare raqs karte hain

tumhaare nam ke pahlu mein jab likhta hun main 'asim'

utarte hi waraq par harf sare raqs karte hain