parwaz jin ki chhuti rahi aasman ko

parvāz jin kī chhūtī rahī āsmān ko

ab vo taras rahe haiñ zarā sī uḌaan ko

afsos aaj ḳhud hī añdheroñ meñ ġharq haiñ

bāñTī jinhoñ ne raushnī saare jahān ko

mashkūk ho ga.ī haiñ unhī kī vafā.eñ haif

sīñchā jinhoñ ne ḳhuun se is gulsitān ko

'izzat milī usī ko vahī mo'tabar huā

jis ne rakhā sañbhāl ke apnī zabān ko

abbū ne jis ke vāste ḳhud ko miTā diyā

beTe miTā rahe haiñ usī urdu zabān ko

har tiir ho rahā hai ḳhatā e'tibār kā

'hasrat' durust kījiye apnī kamān ko

parwaz jin ki chhuti rahi aasman ko

ab wo taras rahe hain zara si uDan ko

afsos aaj KHud hi andheron mein gharq hain

banTi jinhon ne raushni sare jahan ko

mashkuk ho gai hain unhi ki wafaen haif

sincha jinhon ne KHun se is gulsitan ko

'izzat mili usi ko wahi mo'tabar hua

jis ne rakha sanbhaal ke apni zaban ko

abbu ne jis ke waste KHud ko miTa diya

beTe miTa rahe hain usi urdu zaban ko

har tir ho raha hai KHata e'tibar ka

'hasrat' durust kijiye apni kaman ko