pas-e-ghubar-e-taghaful jo ek daricha tha

pas-e-ġhubār-e-taġhāful jo ik darīcha thā

usī se hijr kā sūraj tulū' honā thā

sukūt-e-shab thā dar-o-bām the siyāhī thī

pa.e-shumār bahut duur ik sitārā thā

mire hī dam se haiñ raushan ye mehr-o-māh nujūm

mujhe nikāl ke is kā.enāt meñ kyā thā

palaT na jaatī agar raushnī to kyā kartī

fasīl meñ koī rauzan na koī raḳhna thā

ba-īñ-dalīl hue saare falsafe bātil

kahīñ charāġh se pahle charāġh jaltā thā

sharīk ho ke bhī mā'dūm thī mirī shirkat

jo maiñ nahīñ to sar-e-bazm kaun tanhā thā

jo zarra thā to chhupā thā kahāñ mirā jauhar

darūn-e-zāt ye aksar savāl uThtā thā

pas-e-ghubar-e-taghaful jo ek daricha tha

usi se hijr ka suraj tulu' hona tha

sukut-e-shab tha dar-o-baam the siyahi thi

pae-shumar bahut dur ek sitara tha

mere hi dam se hain raushan ye mehr-o-mah nujum

mujhe nikal ke is kaenat mein kya tha

palaT na jati agar raushni to kya karti

fasil mein koi rauzan na koi raKHna tha

ba-in-dalil hue sare falsafe baatil

kahin charagh se pahle charagh jalta tha

sharik ho ke bhi ma'dum thi meri shirkat

jo main nahin to sar-e-bazm kaun tanha tha

jo zarra tha to chhupa tha kahan mera jauhar

darun-e-zat ye aksar sawal uThta tha