پس غبار تغافل جو اک دریچہ تھا

پس غبار تغافل جو اک دریچہ تھا

اسی سے ہجر کا سورج طلوع ہونا تھا

سکوت شب تھا در و بام تھے سیاہی تھی

پئے شمار بہت دور اک ستارا تھا

مرے ہی دم سے ہیں روشن یہ مہر و ماہ نجوم

مجھے نکال کے اس کائنات میں کیا تھا

پلٹ نہ جاتی اگر روشنی تو کیا کرتی

فصیل میں کوئی روزن نہ کوئی رخنہ تھا

بایں دلیل ہوئے سارے فلسفے باطل

کہیں چراغ سے پہلے چراغ جلتا تھا

شریک ہو کے بھی معدوم تھی مری شرکت

جو میں نہیں تو سر بزم کون تنہا تھا

جو ذرہ تھا تو چھپا تھا کہاں مرا جوہر

درون ذات یہ اکثر سوال اٹھتا تھا