pata jab tak nahin pakka hamara

pata jab tak nahīñ pakkā hamārā

vahī manzil vahī rasta hamārā

hamārī justujū itnī thī us ko

nahīñ pahchāntā chehra hamārā

thī jis se aas vo muñh pher baiThā

nikal paayā nahīñ parcha hamārā

kahānī sun ke sab uTh hī rahe the

kisī ne paḌh liyā chehra hamārā

abhī bachpan ke kuchh sapne haiñ baaqī

abhī bhārī hai ye basta hamārā

hameñ hālāt ne aise nichoḌā

lahū se ban gayā ḳhāka hamārā

nazar-andāz karnā hī paḌā phir

koī 'āshiq thā bechāra hamārā

samajhtī thī jo laḌkī ham ko pāgal

vahī taktī hai ab rasta hamārā

tumhīñ ne ham ko saudā.ī banāyā

mohabbat thā nahīñ pesha hamārā

'salīl' ik 'umr guzrī ab to shāyad

nahīñ kartā ho vo charchā hamārā

pata jab tak nahin pakka hamara

wahi manzil wahi rasta hamara

hamari justuju itni thi us ko

nahin pahchanta chehra hamara

thi jis se aas wo munh pher baiTha

nikal paya nahin parcha hamara

kahani sun ke sab uTh hi rahe the

kisi ne paDh liya chehra hamara

abhi bachpan ke kuchh sapne hain baqi

abhi bhaari hai ye basta hamara

hamein haalat ne aise nichoDa

lahu se ban gaya KHaka hamara

nazar-andaz karna hi paDa phir

koi 'ashiq tha bechaara hamara

samajhti thi jo laDki hum ko pagal

wahi takti hai ab rasta hamara

tumhin ne hum ko saudai banaya

mohabbat tha nahin pesha hamara

'salil' ek 'umr guzri ab to shayad

nahin karta ho wo charcha hamara