phal jo angnai ki diwaron se bahar aaenge

phal jo añgnā.ī kī dīvāroñ se bāhar ā.eñge

ai darḳhto soch lo tum par bhī patthar ā.eñge

har qadam chauñkā.eñge jo manziloñ kī raah meñ

soch kar chalnā yahāñ aise bhī manzar ā.eñge

bas isī ummīd par kaaTe haiñ ham ne roz-o-shab

kuchh na.e jugnū chamakte apne bhī ghar ā.eñge

ham yahāñ pahuñche haiñ rakh kar apne hī siine pe paañv

dekhnā hai kaun se ilzām ab sar ā.eñge

jaan dene ke liye maqtal bhī hai ḳhud āshnā

jab bhī ā.eñge to ham bhī muskurā kar ā.eñge

phal jo angnai ki diwaron se bahar aaenge

ai darKHto soch lo tum par bhi patthar aaenge

har qadam chaunkaenge jo manzilon ki rah mein

soch kar chalna yahan aise bhi manzar aaenge

bas isi ummid par kaTe hain hum ne roz-o-shab

kuchh nae jugnu chamakte apne bhi ghar aaenge

hum yahan pahunche hain rakh kar apne hi sine pe panw

dekhna hai kaun se ilzam ab sar aaenge

jaan dene ke liye maqtal bhi hai KHud aashna

jab bhi aaenge to hum bhi muskura kar aaenge