پھر دل کے آئنے میں اترنے لگی ہو تم

پھر دل کے آئنے میں اترنے لگی ہو تم

شیشے کی دھول اڑا کے سنورنے لگی ہو تم

میرے لئے تو پنکھ سے ہلکی ہو آج بھی

کچھ لوگ کہہ رہے تھے کہ بھرنے لگی ہو تم

یہ روپ یہ لچک یہ چمک اور یہ نمک

شادی کے بعد اور نکھرنے لگی ہو تم

میں کوئلے کی طرح سلگنے لگا ہوں جان

لوبان کے دھوئیں سی بکھرنے لگی ہو تم

اکثر میں دیکھتا ہوں کہ شیشے کے شہر سے

پتھر کی پالکی میں گزرنے لگی ہو تم

کس سے کہوں کہ روح کے کاغذ پے آج کل

چنگاریوں کی طرح ٹھہرنے لگی ہو تم

گیلی ہے میری آنکھ تو کیا دل کے دیس میں

پانی کے راستے سے اترنے لگی ہو تم