phir se soe hue jazbaat ne shiddat pakDi

phir se so.e hue jazbāt ne shiddat pakḌī

tujh ko dekhā to mire ishq ne vahshat pakḌī

tujh se kahtā thā na sanjīda rahā kar itnā

muskurāyā hai to ruḳhsār ne zīnat pakḌī

kab se ḳhāmosh paḌā thā ye mire siine meñ

jab tirā naam liyā qalb ne harakat pakḌī

jaane allāh ne kis tarah banāyā tujh ko

raushnī chāñd se lī phuul se rangat pakḌī

tū hī rakhtā hai har ik merī zarūrat kā ḳhayāl

jab badan sard huā tujh se harārat pakḌī

ḳhatm hotā hī nahīñ tujh ko samajhne kā amal

tū ḳhafā jab bhī huā maiñ ne nasīhat pakḌī

tujh se pahle thī kahāñ dād-e-suḳhan kī bārish

tujh pe likkhā hai to ash.ār ne izzat pakḌī

phir se soe hue jazbaat ne shiddat pakDi

tujh ko dekha to mere ishq ne wahshat pakDi

tujh se kahta tha na sanjida raha kar itna

muskuraya hai to ruKHsar ne zinat pakDi

kab se KHamosh paDa tha ye mere sine mein

jab tera nam liya qalb ne harakat pakDi

jaane allah ne kis tarah banaya tujh ko

raushni chand se li phul se rangat pakDi

tu hi rakhta hai har ek meri zarurat ka KHayal

jab badan sard hua tujh se hararat pakDi

KHatm hota hi nahin tujh ko samajhne ka amal

tu KHafa jab bhi hua main ne nasihat pakDi

tujh se pahle thi kahan dad-e-suKHan ki barish

tujh pe likkha hai to ashaar ne izzat pakDi