پھر سے سوئے ہوئے جذبات نے شدت پکڑی

پھر سے سوئے ہوئے جذبات نے شدت پکڑی

تجھ کو دیکھا تو مرے عشق نے وحشت پکڑی

تجھ سے کہتا تھا نہ سنجیدہ رہا کر اتنا

مسکرایا ہے تو رخسار نے زینت پکڑی

کب سے خاموش پڑا تھا یہ مرے سینے میں

جب ترا نام لیا قلب نے حرکت پکڑی

جانے اللہ نے کس طرح بنایا تجھ کو

روشنی چاند سے لی پھول سے رنگت پکڑی

تو ہی رکھتا ہے ہر اک میری ضرورت کا خیال

جب بدن سرد ہوا تجھ سے حرارت پکڑی

ختم ہوتا ہی نہیں تجھ کو سمجھنے کا عمل

تو خفا جب بھی ہوا میں نے نصیحت پکڑی

تجھ سے پہلے تھی کہاں داد سخن کی بارش

تجھ پہ لکھا ہے تو اشعار نے عزت پکڑی