phir tez hawa chalte hi be-kal huin shaKHen

phir tez havā chalte hī be-kal huiiñ shāḳheñ

kis dard ke ehsās se bojhal huiiñ shāḳheñ

kyā soch ke raqsāñ haiñ sar-e-shām khule sar

kis kāhish-e-be-nām se pāgal huiiñ shāḳheñ

girte hue pattoñ kī taḌaptī huī lāsheñ

sad-tantana-e-zīst kā maqtal huiiñ shāḳheñ

tarsī huī bāheñ haiñ humakte hue āġhosh

dīvāngī-e-shauq kā symbol huiiñ shāḳheñ

phir raat ke ashkoñ se fazā bhiig chalī hai

phir os kī barsāt se shītal huiiñ shāḳheñ

jhoñke haiñ ki shahnā.ī ke sur jaag rahe haiñ

ik naġhma-gar-e-nāz kī paa.el huiiñ shāḳheñ

bargad kā tanā ek sadī umr-e-ravāñ kī

saa.e haiñ mah-o-sāl to pal pal huiiñ shāḳheñ

har Daal pe ik TūTtī añgḌā.ī kā aalam

shab-bhar jo havā tez rahī shal huiiñ shāḳheñ

jaatā huā mahtāb jo dam-bhar ko rukā hai

ik mahvash-e-tannāz kā āñchal huiiñ shāḳheñ

jab Duub gayā ġham ke ufuq meñ dil-e-tanhā

mahtāb se duur aañkh se ojhal huiiñ shāḳheñ

phir tez hawa chalte hi be-kal huin shaKHen

kis dard ke ehsas se bojhal huin shaKHen

kya soch ke raqsan hain sar-e-sham khule sar

kis kahish-e-be-nam se pagal huin shaKHen

girte hue patton ki taDapti hui lashen

sad-tantana-e-zist ka maqtal huin shaKHen

tarsi hui bahen hain humakte hue aaghosh

diwangi-e-shauq ka symbol huin shaKHen

phir raat ke ashkon se faza bhig chali hai

phir os ki barsat se shital huin shaKHen

jhonke hain ki shahnai ke sur jag rahe hain

ek naghma-gar-e-naz ki pael huin shaKHen

bargad ka tana ek sadi umr-e-rawan ki

sae hain mah-o-sal to pal pal huin shaKHen

har Dal pe ek TuTti angDai ka aalam

shab-bhar jo hawa tez rahi shal huin shaKHen

jata hua mahtab jo dam-bhar ko ruka hai

ek mahwash-e-tannaz ka aanchal huin shaKHen

jab Dub gaya gham ke ufuq mein dil-e-tanha

mahtab se dur aankh se ojhal huin shaKHen