پھر وہی لطف خلش ہو وہی سوزش دیکھوں

پھر وہی لطف خلش ہو وہی سوزش دیکھوں

کیا بگاڑے گی مرا چرخ کی گردش دیکھوں

طرز بیداد نے کچھ لطف دیا ہے ایسا

پھر یہ حسرت ہے انہیں گرم نوازش دیکھوں

آپ کی چشم فسوں گر کا کرم کیا کم ہے

اب بھلا کس لیے افلاک کی گردش دیکھوں

چشم مخمور کی کیا ہوش ربائی کم ہے

حسرت بادہ کروں جام کی گردش دیکھوں

وہ نہ آئے نہ سہی خود مجھے کب ہے منظور

دل بیمار کو منت کش پرسش دیکھوں

خون دل سے یہ غزل آج لکھی ہے کیفیؔ

رنگ کیا لائے گا یہ طرز نگارش دیکھوں