phir yun hua ki aankh mein tinka jhulas gaya

phir yuuñ huā ki aañkh meñ tinkā jhulas gayā

bādal kī tarh ḳhvāb kā sho'la baras gayā

phir yuuñ huā ki chhipkalī baiThī hathelī par

aur ek saañp apnī hī kunDalī meñ phañs gayā

phir yuuñ huā ki abr kā saayā nichoḌ kar

mausam mire ḳhayāl kī shāḳhoñ ko Das gayā

phir yuuñ huā ki chāñdnī ne bad-du'ā.eñ diiñ

aur ek peḌ apne hī saa.e meñ dhañs gayā

phir yuuñ huā ki mere garebāñ ko thaam kar

dāman ke saath bāġhche kā ḳhāk-o-ḳhas gayā

phir yuuñ huā ki naġhma-e-hangāma-ḳhez kī

zanjīr toḌne ko maiñ le kar jaras gayā

phir yuuñ huā ki terī tamanna ke josh meñ

ai shāḳh-e-gard haath se mere qafas gayā

phir yuuñ huā ki bhuul ga.e log jast-o-ḳhez

ham kyā ga.e ki daur-e-havā-o-havas gayā

phir yuuñ huā ki aa.ine maḳhlūq khā ga.e

aur ā.inoñ ke 'aks meñ ik shahr bas gayā

phir yun hua ki aankh mein tinka jhulas gaya

baadal ki tarh KHwab ka sho'la baras gaya

phir yun hua ki chhipkali baiThi hatheli par

aur ek sanp apni hi kunDali mein phans gaya

phir yun hua ki abr ka saya nichoD kar

mausam mere KHayal ki shaKHon ko Das gaya

phir yun hua ki chandni ne bad-du'aen din

aur ek peD apne hi sae mein dhans gaya

phir yun hua ki mere gareban ko tham kar

daman ke sath baghche ka KHak-o-KHas gaya

phir yun hua ki naghma-e-hangama-KHez ki

zanjir toDne ko main le kar jaras gaya

phir yun hua ki teri tamanna ke josh mein

ai shaKH-e-gard hath se mere qafas gaya

phir yun hua ki bhul gae log jast-o-KHez

hum kya gae ki daur-e-hawa-o-hawas gaya

phir yun hua ki aaine maKHluq kha gae

aur aainon ke 'aks mein ek shahr bas gaya