phirta hun dar-ba-dar main liye dil dukha hua

phirtā huuñ dar-ba-dar maiñ liye dil dukhā huā

ik ik qadam pe zaḳhm-e-jigar phir harā huā

is daur kā ye sab se baḌā almiya huā

har aadmī hai shahr meñ ḳhud se Darā huā

hañs hañs ke pūchhtā hai vo zālim khaḌā huā

barpā huā fasād to anjām kyā huā

hālāt hoñ ḳharāb to phir kis se kyā gila

mushkil meñ apnā saaya bhī ham se judā huā

e’lān-e-jang karte ho har zulm ke ḳhilāf

logoñ ko ham se bārhā yuuñ bhī gila huā

us par kisī bhī baat pe ham kab ḳhafā hue

chhoTī sī baat par jo zamāna ḳhafā huā

kartā hai ehtirām vo har shaḳhs kā magar

mar'ūb to kisī se na hargiz 'ziyā' huā

phirta hun dar-ba-dar main liye dil dukha hua

ek ek qadam pe zaKHm-e-jigar phir hara hua

is daur ka ye sab se baDa almiya hua

har aadmi hai shahr mein KHud se Dara hua

hans hans ke puchhta hai wo zalim khaDa hua

barpa hua fasad to anjam kya hua

haalat hon KHarab to phir kis se kya gila

mushkil mein apna saya bhi hum se juda hua

e’lan-e-jang karte ho har zulm ke KHilaf

logon ko hum se barha yun bhi gila hua

us par kisi bhi baat pe hum kab KHafa hue

chhoTi si baat par jo zamana KHafa hua

karta hai ehtiram wo har shaKHs ka magar

mar'ub to kisi se na hargiz 'ziya' hua