phulne-phalne lage hain sahab-e-zar aur bhi

phūlne-phalne lage haiñ sāhab-e-zar aur bhī

tañg ho jā.egī dhartī muflisoñ par aur bhī

ye zamīñ zarḳhez hogī ḳhuun pī kar aur bhī

khetiyāñ uglā kareñgī la.al-o-gauhar aur bhī

har zamāne meñ subūt-e-ishq māñgā jā.egā

laal maaoñ ke chaḌheñge sūliyoñ par aur bhī

phūlte-phalte haiñ jazbe dard ke māhaul meñ

zaḳhm khā.eñ to nikharte haiñ suḳhan-var aur bhī

āftāb ubhrā hai jis din se na.ī tahzīb kā

ho gayā tārīk insāñ kā muqaddar aur bhī

jab chalī tahrīk ta.amīr-e-vatan kī dosto

ho ga.e barbād kuchh baste hue ghar aur bhī

jis qadar bāhar kī raunaq meñ magan hotā gayā

baḌh ga.ī be-raunaqī insāñ ke andar aur bhī

maiñ banātā jā rahā huuñ aur bhī kuchh aa.ine

vaqt barsātā chalā jaatā hai patthar aur bhī

bastiyoñ par hādsoñ kī chāñd-mārī ke liye

baḌh rahe haiñ auj kī jānib sitamgar aur bhī

munfarid ustād 'dānish' bhī haiñ ġhālib kī tarah

yuuñ to duniyā meñ haiñ 'nāz' achchhe suḳhan-var aur bhī

phulne-phalne lage hain sahab-e-zar aur bhi

tang ho jaegi dharti muflison par aur bhi

ye zamin zarKHez hogi KHun pi kar aur bhi

khetiyan ugla karengi lal-o-gauhar aur bhi

har zamane mein subut-e-ishq manga jaega

lal maon ke chaDhenge suliyon par aur bhi

phulte-phalte hain jazbe dard ke mahaul mein

zaKHm khaen to nikharte hain suKHan-war aur bhi

aaftab ubhra hai jis din se nai tahzib ka

ho gaya tarik insan ka muqaddar aur bhi

jab chali tahrik tamir-e-watan ki dosto

ho gae barbaad kuchh baste hue ghar aur bhi

jis qadar bahar ki raunaq mein magan hota gaya

baDh gai be-raunaqi insan ke andar aur bhi

main banata ja raha hun aur bhi kuchh aaine

waqt barsata chala jata hai patthar aur bhi

bastiyon par hadson ki chand-mari ke liye

baDh rahe hain auj ki jaanib sitamgar aur bhi

munfarid ustad 'danish' bhi hain ghaalib ki tarah

yun to duniya mein hain 'naz' achchhe suKHan-war aur bhi