phulon mein ye mahki hui KHushbu hai ki tum ho

phūloñ meñ ye mahkī huī ḳhushbū hai ki tum ho

mujh par koī chhāyā huā jaadū hai ki tum ho

alfāz adā hoñ kabhī lab se jo tumhāre

hotā hai gumāñ mujh ko ki urdu hai ki tum ho

ai jān-e-ġhazal mere taḳhayyul ke ufuq par

raushan sā chamaktā huā jugnū hai ki tum ho

bulbul kī navā ho ki ho jharnoñ kā tarannum

batlāo ki koyal kī ye kuukū hai ki tum ho

zohra ho atārad ho ki mahvash ho sarāpā

āfāq meñ tābāñ koī mah-rū hai ki tum ho

tum raag ho dīpak kā ki malhār ho koī

har saaz meñ pinhāñ koī jaadū hai ki tum ho

'fāḳhir' kā ho dukhḌā ki koī shaam ho ġham kī

āñkhoñ se ye Tapkā huā aañsū hai ki tum ho

phulon mein ye mahki hui KHushbu hai ki tum ho

mujh par koi chhaya hua jadu hai ki tum ho

alfaz ada hon kabhi lab se jo tumhaare

hota hai guman mujh ko ki urdu hai ki tum ho

ai jaan-e-ghazal mere taKHayyul ke ufuq par

raushan sa chamakta hua jugnu hai ki tum ho

bulbul ki nawa ho ki ho jharnon ka tarannum

batlao ki koyal ki ye kuku hai ki tum ho

zohra ho atarad ho ki mahwash ho sarapa

aafaq mein taban koi mah-ru hai ki tum ho

tum rag ho dipak ka ki malhaar ho koi

har saz mein pinhan koi jadu hai ki tum ho

'faKHir' ka ho dukhDa ki koi sham ho gham ki

aankhon se ye Tapka hua aansu hai ki tum ho