pichhli raat ki narm chandni shabnam ki KHunki se racha hai

pichhlī raat kī narm chāñdnī shabnam kī ḳhunkī se rachā hai

yuuñ kahne ko us kā tabassum barq-sifat hai sho.ala-numā hai

vaqt ko māh-o-sāl kī zanjīroñ meñ jakaḌ kar kyā paayā hai

vaqt to māh-o-sāl kī zanjīroñ meñ aur bhī tez baḌhā hai

ik ma.asūm se pyaar kā tohfa ghar ke āñgan meñ paayā thā

us ko ġham ke pāgal-pan meñ koThe koThe baañT diyā hai

aañsū taare rañg gulāb sabhī pardes chale jaate haiñ

āḳhir āḳhir tanhā.ī hai kis ne kis kā saath diyā hai

nazm ġhazal afsāna giit ik tarah hī ġham thā jis ko ham ne

kaisā kaisā naam diyā hai kaise kaise baañT liyā hai

aahoñ ke bādal kyuuñ dil meñ bin barse hī lauT ga.e haiñ

ab ke baras sāvan kā mahīna kaisā pyāsā pyāsā gayā hai

phuul sī har tasvīr meñ zehn kī dīvāroñ se utaar chukā huuñ

phir bhī dil meñ kāñTā sā kyuuñ rah rah kar chubhtā rahtā hai

majbūrī thī sabr kiyā hai paañv ko toḌ ke baiTh rahe haiñ

nagrī nagrī dekh chuke haiñ dvāre dvāre jhāñk liyā hai

mujh ko un sachchī bātoñ se apne jhuuT bahut pyāre haiñ

jin sachchī bātoñ se aksar insānoñ kā ḳhuun bahā hai

'badr' tumhārī fikr-e-suḳhan par ik allāma hañs kar bole

vo laḌkā nau-umr parinda ūñchā uḌnā siikh rahā hai

pichhli raat ki narm chandni shabnam ki KHunki se racha hai

yun kahne ko us ka tabassum barq-sifat hai shoala-numa hai

waqt ko mah-o-sal ki zanjiron mein jakaD kar kya paya hai

waqt to mah-o-sal ki zanjiron mein aur bhi tez baDha hai

ek masum se pyar ka tohfa ghar ke aangan mein paya tha

us ko gham ke pagal-pan mein koThe koThe banT diya hai

aansu tare rang gulab sabhi pardes chale jate hain

aaKHir aaKHir tanhai hai kis ne kis ka sath diya hai

nazm ghazal afsana git ek tarah hi gham tha jis ko hum ne

kaisa kaisa nam diya hai kaise kaise banT liya hai

aahon ke baadal kyun dil mein bin barse hi lauT gae hain

ab ke baras sawan ka mahina kaisa pyasa pyasa gaya hai

phul si har taswir mein zehn ki diwaron se utar chuka hun

phir bhi dil mein kanTa sa kyun rah rah kar chubhta rahta hai

majburi thi sabr kiya hai panw ko toD ke baiTh rahe hain

nagri nagri dekh chuke hain dware dware jhank liya hai

mujh ko un sachchi baaton se apne jhuT bahut pyare hain

jin sachchi baaton se aksar insanon ka KHun baha hai

'badr' tumhaari fikr-e-suKHan par ek allama hans kar bole

wo laDka nau-umr parinda uncha uDna sikh raha hai