pila mat aankh se itni ye mai-KHwari ziyaada hai

pilā mat aañkh se itnī ye mai-ḳhvārī ziyāda hai

nasha ye jaan le legā ye sarshārī ziyāda hai

ruḳh-e-raushan ko parde meñ chhupā rakkho in āñkhoñ kī

basārat ho na ḳhīra ye ziyā-bārī ziyāda hai

ta'alluq aur shai hai rabt-e-dil hai aur hī rishta

nibhātī jā rahī huuñ par adākārī ziyāda hai

guñdhī hai ḳhaak aisī vahshatoñ se chaak par tere

mirī tā'mīr kam hai merī mismārī ziyāda hai

talab ātish kī zarf-e-‘ishq par hai munhasir jaise

alaao hai mujhe kam tum ko chingārī ziyāda hai

nahīñ tāb-o-tavāñ shal ho ga.e paaoñ rihā.ī de

tire ehsān kī zanjīr kuchh bhārī ziyāda hai

riyāzat se bhī hai naḳhl-e-suḳhan go bārvar lekin

buzurgoñ kī du'āoñ se samar-bārī ziyāda hai

vo lazzat ranj meñ paa.ī udāsī raas yuuñ aa.ī

ḳhushī hai do ghaḌī dil kī 'azā-dārī ziyāda hai

ḳhumār-e-vasl-e-jānāñ bhī milā do chaar pal garche

sharāb-e-hijr kā nashsha magar taarī ziyāda hai

yahāñ ḳhuddāriyāñ kaisī dayār-e-'ishq hai 'nasrīn'

hai jis meñ sargirānī kam subuksārī ziyāda hai

pila mat aankh se itni ye mai-KHwari ziyaada hai

nasha ye jaan le lega ye sarshaari ziyaada hai

ruKH-e-raushan ko parde mein chhupa rakkho in aankhon ki

basarat ho na KHira ye ziya-bari ziyaada hai

ta'alluq aur shai hai rabt-e-dil hai aur hi rishta

nibhati ja rahi hun par adakari ziyaada hai

gundhi hai KHak aisi wahshaton se chaak par tere

meri ta'mir kam hai meri mismari ziyaada hai

talab aatish ki zarf-e-‘ishq par hai munhasir jaise

alao hai mujhe kam tum ko chingari ziyaada hai

nahin tab-o-tawan shal ho gae paon rihai de

tere ehsan ki zanjir kuchh bhaari ziyaada hai

riyazat se bhi hai naKHl-e-suKHan go barwar lekin

buzurgon ki du'aon se samar-bari ziyaada hai

wo lazzat ranj mein pai udasi ras yun aai

KHushi hai do ghaDi dil ki 'aza-dari ziyaada hai

KHumar-e-wasl-e-jaanan bhi mila do chaar pal garche

sharab-e-hijr ka nashsha magar tari ziyaada hai

yahan KHuddariyan kaisi dayar-e-'ishq hai 'nasrin'

hai jis mein sargirani kam subuksari ziyaada hai