pindar-e-zohd ho ki ghurur-e-barhamani

pindār-e-zohd ho ki ġhurūr-e-barhamanī

is dair-e-but-shikan meñ hai har but shikastnī

sarsar chale ki tund bagūloñ kā raqs ho

mauj-e-numū ravāñ hai to har gul shaguftanī

gul-chīn-o-gul-farosh kī ḳhātir hai fasl-e-gul

aur qismat-e-junūñ hai faqat chāk-dāmanī

dīvār-e-abr khīñchiye kirnoñ kī raah meñ

zarroñ meñ qaid kījiye sūraj kī raushnī

mauj-e-nafas se larze hai tār-e-rag-e-hayāt

phailī hai shahr-e-dil meñ vo pur-haul sansanī

pindar-e-zohd ho ki ghurur-e-barhamani

is dair-e-but-shikan mein hai har but shikastni

sarsar chale ki tund bagulon ka raqs ho

mauj-e-numu rawan hai to har gul shaguftani

gul-chin-o-gul-farosh ki KHatir hai fasl-e-gul

aur qismat-e-junun hai faqat chaak-damani

diwar-e-abr khinchiye kirnon ki rah mein

zarron mein qaid kijiye suraj ki raushni

mauj-e-nafas se larze hai tar-e-rag-e-hayat

phaili hai shahr-e-dil mein wo pur-haul sansani