پرانے عہد کے سکے کہاں چلا رہے ہو

پرانے عہد کے سکے کہاں چلا رہے ہو

وفا خلوص محبت یہ کیا سنا رہے ہو

بھلا تم اتنے اذیت پسند کب سے ہوئے

جو بات بات پہ یوں قہقہے لگا رہے ہو

سفر ہی خانہ بدوشوں کو زیب دیتا ہے

سرائے کافی ہے گھر بار کیوں بنا رہے ہو

کرن کرن کو ترستے ہیں میرے گاؤں کے لوگ

اور ایک تم کہ ندی میں دیے بہا رہے ہو

تمہاری آنکھ میں اک بے کنار حسرت ہے

تم اس سے پہلے کہیں اور مبتلا رہے ہو

کوئی تو ہو جو گلے سے لگا کے پوچھے مجھے

بتاؤ بدرؔ مری جان کیا چھپا رہے ہو