purkhon ke din to behtar kaT jate the

purkhoñ ke din to behtar kaT jaate the

hijrat karte hī aksar kaT jaate the

maiñ ik aise gaañv kā rahne vaalā thā

sailāboñ meñ jis ke ghar kaT jaate the

is bastī meñ ab bas gūñge rahte haiñ

jin ke lab khulte the sar kaT jaate the

is panchhī kī lāchārī tum kyā jaano

'ain ḳhalā meñ jis ke par kaT jaate the

ik jangal kī vahshat-nāk havāoñ se

rozāna do chaar shajar kaT jaate the

us ke naam meñ jaane kaisā jaadū thā

us ke naam se tez bhañvar kaT jaate the

'āsif' ham vo ism-e-ā'zam bhuul ga.e

dam karte hī sab mantar kaT jaate the

purkhon ke din to behtar kaT jate the

hijrat karte hi aksar kaT jate the

main ek aise ganw ka rahne wala tha

sailabon mein jis ke ghar kaT jate the

is basti mein ab bas gunge rahte hain

jin ke lab khulte the sar kaT jate the

is panchhi ki lachaari tum kya jaano

'ain KHala mein jis ke par kaT jate the

ek jangal ki wahshat-nak hawaon se

rozana do chaar shajar kaT jate the

us ke nam mein jaane kaisa jadu tha

us ke nam se tez bhanwar kaT jate the

'asif' hum wo ism-e-a'zam bhul gae

dam karte hi sab mantar kaT jate the