qatil ko bhala kis ne yun chhoD diya hoga

qātil ko bhalā kis ne yuuñ chhoḌ diyā hogā

munsif ke bhī hāthoñ meñ kuchh ḳhuun lagā hogā

in tez havāoñ ne jo diip bujhā.e haiñ

terā hī nahīñ in meñ merā bhī diyā hogā

chūlhoñ se ġharīboñ ke kab itnā dhuāñ uThThā

phir merī hī bastī kā ghar koī jalā hogā

āḳhir ye jhijhak kaisī tum vaar karo khul kar

ham ḳhud hī uThā deñge jo tiir ḳhatā hogā

vo jis ke tasavvur se zālim bhī larazte haiñ

vo sho'la ġharīboñ kī aahoñ meñ chhupā hogā

miTte haiñ zamāne meñ ye sochne vaale hī

hogā vahī jo apnī qismat meñ likhā hogā

aaj aisī hī mahfil meñ baiThā huuñ jahāñ 'shādāñ'

chup huuñ to kudūrat hai bolūñ to gila hogā

qatil ko bhala kis ne yun chhoD diya hoga

munsif ke bhi hathon mein kuchh KHun laga hoga

in tez hawaon ne jo dip bujhae hain

tera hi nahin in mein mera bhi diya hoga

chulhon se gharibon ke kab itna dhuan uThTha

phir meri hi basti ka ghar koi jala hoga

aaKHir ye jhijhak kaisi tum war karo khul kar

hum KHud hi uTha denge jo tir KHata hoga

wo jis ke tasawwur se zalim bhi larazte hain

wo sho'la gharibon ki aahon mein chhupa hoga

miTte hain zamane mein ye sochne wale hi

hoga wahi jo apni qismat mein likha hoga

aaj aisi hi mahfil mein baiTha hun jahan 'shadan'

chup hun to kudurat hai bolun to gila hoga