qad ghaT gae wo sab ke barabar nahin rahe

qad ghaT ga.e vo sab ke barābar nahīñ rahe

jo log bastī vāloñ se mil kar nahīñ rahe

lāzim hai ehtiyāt ki fitna hai shahr meñ

hālāñki bastī vāloñ se ham Dar nahīñ rahe

panghaT nahīñ rahe na khanak chūḌiyoñ kī hai

jab se hamāre gaañv meñ chhappar nahīñ rahe

ik 'umr apne qadmoñ se lipTā rahā safar

ham jis qadar safar meñ rahe ghar nahīñ rahe

tab jā ke yuuñ rukā thā tashaddud kā silsila

hāthoñ meñ jab kisī ke bhī patthar nahīñ rahe

ham be-qabā haiñ aaj na chādar hī sar pe hai

aise to ham kabhī bilā-bistar nahīñ rahe

yaaro sanad mile hameñ jin ke kalām se

is daur meñ ab aise suḳhanvar nahīñ rahe

jis shahr kī fazāoñ meñ nafrat kā zahr ho

us shahr-e-be-amāñ meñ 'munavvar' nahīñ rahe

qad ghaT gae wo sab ke barabar nahin rahe

jo log basti walon se mil kar nahin rahe

lazim hai ehtiyat ki fitna hai shahr mein

haalanki basti walon se hum Dar nahin rahe

panghaT nahin rahe na khanak chuDiyon ki hai

jab se hamare ganw mein chhappar nahin rahe

ek 'umr apne qadmon se lipTa raha safar

hum jis qadar safar mein rahe ghar nahin rahe

tab ja ke yun ruka tha tashaddud ka silsila

hathon mein jab kisi ke bhi patthar nahin rahe

hum be-qaba hain aaj na chadar hi sar pe hai

aise to hum kabhi bila-bistar nahin rahe

yaro sanad mile hamein jin ke kalam se

is daur mein ab aise suKHanwar nahin rahe

jis shahr ki fazaon mein nafrat ka zahr ho

us shahr-e-be-aman mein 'munawwar' nahin rahe