qadam-qadam pe tu ai rah-rau qiyam na kar

qadam-qadam pe tū ai rāh-rau qiyām na kar

maqām-e-yār se pahle kahīñ maqām na kar

tire liye to sabhī manzileñ marāhil haiñ

rah-e-talab ke musāfir safar tamām na kar

ye shahr hai yahāñ matlab kī baat hotī hai

ġharaz na ho to paḌosī se bhī kalām na kar

lage na Thes kisī dil pe be-ruḳhī se tirī

bhale hī mandir-o-masjid kā ehtirām na kar

na chheḌ zikr ġham-e-dil kā jā-ba-jā tū 'sadā'

jo ḳhaas un ke liye hai vo baat 'aam na kar

qadam-qadam pe tu ai rah-rau qiyam na kar

maqam-e-yar se pahle kahin maqam na kar

tere liye to sabhi manzilen marahil hain

rah-e-talab ke musafir safar tamam na kar

ye shahr hai yahan matlab ki baat hoti hai

gharaz na ho to paDosi se bhi kalam na kar

lage na Thes kisi dil pe be-ruKHi se teri

bhale hi mandir-o-masjid ka ehtiram na kar

na chheD zikr gham-e-dil ka ja-ba-ja tu 'sada'

jo KHas un ke liye hai wo baat 'am na kar