qadghan agar labon se uThai na jaegi

qadġhan agar laboñ se uThā.ī na jā.egī

aisī lagegī aag bujhā.ī na jā.egī

aage jabīñ sitam ke jhukā.ī na jā.egī

ham se chitā ḳhud apnī jalā.ī na jā.egī

hamdard bhī ho tum mire ġham-ḳhvār bhī magar

rūdād dil kī mujh se sunā.ī na jā.egī

ham haiñ haqīqatoñ ke parastār dosto

jhūTī hañsī laboñ pe sajā.ī na jā.egī

insāñ ke dukh bhī bāñTiye fursat nikāl ke

bekār aap kī ye kamā.ī na jā.egī

kar ke 'amal dikhāo zarā ḳhud bhī vā.izo

taqrīr se tumhārī burā.ī na jā.egī

'hātif' ‘urūs-e-zīst kī kuchh qadr kījiye

rūThī kabhī agar to manā.ī na jā.egī

qadghan agar labon se uThai na jaegi

aisi lagegi aag bujhai na jaegi

aage jabin sitam ke jhukai na jaegi

hum se chita KHud apni jalai na jaegi

hamdard bhi ho tum mere gham-KHwar bhi magar

rudad dil ki mujh se sunai na jaegi

hum hain haqiqaton ke parastar dosto

jhuTi hansi labon pe sajai na jaegi

insan ke dukh bhi banTiye fursat nikal ke

bekar aap ki ye kamai na jaegi

kar ke 'amal dikhao zara KHud bhi waizo

taqrir se tumhaari burai na jaegi

'hatif' ‘urus-e-zist ki kuchh qadr kijiye

ruThi kabhi agar to manai na jaegi