قفس تک بھی پہنچ ہے یا فقط اک آشیاں تک ہے

قفس تک بھی پہنچ ہے یا فقط اک آشیاں تک ہے

رسائی دیکھنی ہے برق سوزاں کی کہاں تک ہے

مجھے لذت کش بیداد پا کر ہاتھ کیوں روکا

ذرا تو آزماتے حوصلہ دل کا کہاں تک ہے

یقیں اپنی وفا پر ہے تغافل کا نہیں شکوہ

تری بے گانگی ہم جانتے ہیں امتحاں تک ہے

نشیمن پھونک کر ظالم ہوا دیتا ہے دامن کی

غبار خاطر صیاد خاک آشیاں تک ہے

ذرا سا دل ہے لیکن جان ہے بزم دو عالم کی

یہ ساری گرمیٔ ہنگامہ قلب ناتواں تک ہے

شکست دل کا باعث آرزوئے دل کو ٹھہرایا

گمان نیک تجھ سے بد گماں دیکھا کہاں تک ہے

یہی روح تمنا ہے یہی ہے جان دل کیفیؔ

قفس میں زندگی اپنی خیال آشیاں تک ہے