qalam ko KHun mein gharqab dekhte jao

qalam ko ḳhuun meñ ġharqāb dekhte jaao

zamīn-e-sher ko shādāb dekhte jaao

nigāh hote hue sail-e-ḳhūñ pe chup rahnā

hamāre shahr ke ādāb dekhte jaao

pahuñch ga.ī hai sar-e-arsh un kī ḳhāmoshī

ki kushtagāñ ko zafar-yāb dekhte jaao

sajā.e māthe pe apnī tamām tā'bīreñ

hamārī aañkh ke sab ḳhvāb dekhte jaao

sulag rahā hai koī aur jal rahā hai koī

gharoñ kī ye bhī tab-o-tāb dekhte jaao

har ek qabr pe likkhā huā hai naam yahāñ

hamāre mimbar-o-mehrāb dekhte jaao

ġharaz ke saiñkaḌoñ bāzār khul ga.e lekin

ḳhulūs ho gayā nāyāb dekhte jaao

qalam ko KHun mein gharqab dekhte jao

zamin-e-sher ko shadab dekhte jao

nigah hote hue sail-e-KHun pe chup rahna

hamare shahr ke aadab dekhte jao

pahunch gai hai sar-e-arsh un ki KHamoshi

ki kushtagan ko zafar-yab dekhte jao

sajae mathe pe apni tamam ta'biren

hamari aankh ke sab KHwab dekhte jao

sulag raha hai koi aur jal raha hai koi

gharon ki ye bhi tab-o-tab dekhte jao

har ek qabr pe likkha hua hai nam yahan

hamare mimbar-o-mehrab dekhte jao

gharaz ke sainkaDon bazar khul gae lekin

KHulus ho gaya nayab dekhte jao