qalam pe uske nahin hai ab etibar mujhe

qalam pe us ke nahīñ hai ab e'tibār mujhe

miTā chukā hai vo likh likh ke bār-bār mujhe

agar maiñ zaḳhm huuñ to mujh ko darmiyān meñ rakh

agar maiñ tiir huuñ to kar le ār-pār mujhe

use pukār rahā thā maiñ apnī āñkhoñ se

palaT ke dekh to letā vo ek baar mujhe

nashe ko jis kā nasha ho vo aañkh aisī hai

nasha jis aañkh se kahtā hai mat utaar mujhe

ye phuul taaza raheñge tirī rifāqat ke

tirā ḳhayāl rakhegā sadā-bahār mujhe

rafū kī koshisheñ mujh ko udheḌ detī haiñ

sañbhal ke yaar na kar denā taar taar mujhe

davā zarūrī nahīñ kaam bhī kare 'az.har'

ḳhushī to kar ke ga.ī aur sogvār mujhe

qalam pe us ke nahin hai ab e'tibar mujhe

miTa chuka hai wo likh likh ke bar-bar mujhe

agar main zaKHm hun to mujh ko darmiyan mein rakh

agar main tir hun to kar le aar-par mujhe

use pukar raha tha main apni aankhon se

palaT ke dekh to leta wo ek bar mujhe

nashe ko jis ka nasha ho wo aankh aisi hai

nasha jis aankh se kahta hai mat utar mujhe

ye phul taza rahenge teri rifaqat ke

tera KHayal rakhega sada-bahaar mujhe

rafu ki koshishen mujh ko udheD deti hain

sanbhal ke yar na kar dena tar tar mujhe

dawa zaruri nahin kaam bhi kare 'azhar'

KHushi to kar ke gai aur sogwar mujhe