qalam se bartar-o-baala zaban ke bas mein nahin

qalam se bartar-o-bālā zabāñ ke bas meñ nahīñ

maiñ vo sadā huuñ jo lafzoñ kī dastaras meñ nahīñ

guloñ kī tarh badalte nahīñ haiñ ye chehre

tazād zāhir-o-bātin kā ḳhār-o-ḳhas meñ nahīñ

yaqīñ na aa.e to parvāna ban ke dekh zarā

jasāratoñ meñ jo lazzat hai pesh-o-pas meñ nahīñ

tumhārī yādoñ kī nik.hat tumhāre dard ke phuul

chaman meñ kyā thā jo hāsil mujhe qafas meñ nahīñ

junūñ pe is se baḌā tanz aur kyā hogā

ki sang-o-ḳhisht kisī dast-e-bul-havas meñ nahīñ

'ajīb log haiñ vo shai talāsh karte haiñ

vujūd jis kā nahīñ aadmī ke bas meñ nahīñ

is āgahī ne ujāle bhī dil ke chhīn liye

vo raushnī sī jo thī kirmak-e-nafas meñ nahīñ

charāġh-e-bazm nahīñ ye 'azīz' us se kaho

sharār-e-dasht bujhānā havā ke bas meñ nahīñ

qalam se bartar-o-baala zaban ke bas mein nahin

main wo sada hun jo lafzon ki dastaras mein nahin

gulon ki tarh badalte nahin hain ye chehre

tazad zahir-o-baatin ka KHar-o-KHas mein nahin

yaqin na aae to parwana ban ke dekh zara

jasaraton mein jo lazzat hai pesh-o-pas mein nahin

tumhaari yaadon ki nikhat tumhaare dard ke phul

chaman mein kya tha jo hasil mujhe qafas mein nahin

junun pe is se baDa tanz aur kya hoga

ki sang-o-KHisht kisi dast-e-bul-hawas mein nahin

'ajib log hain wo shai talash karte hain

wujud jis ka nahin aadmi ke bas mein nahin

is aagahi ne ujale bhi dil ke chhin liye

wo raushni si jo thi kirmak-e-nafas mein nahin

charagh-e-bazm nahin ye 'aziz' us se kaho

sharar-e-dasht bujhana hawa ke bas mein nahin