qasam hai jaane wale tujhko apne husn-e-kaamil ki

qasam hai jaane vaale tujh ko apne husn-e-kāmil kī

zarā rūdād-e-ġham suntā bhī jā TuuTe hue dil kī

ḳhudārā rahm kar mujh par tū ai vahshat mire dil kī

kahāñ par le chalī mujh ko dikhā kar shakl manzil kī

hameñ khoyā hai qismat ne hamārī lā ke manzil par

na apnā hosh thā ham ko ḳhabar thī kuchh na manzil kī

ajab kyā thā unheñ hālat pe merī rahm aa jaatā

agar rūdād-e-ġham sunte mire TuuTe hue dil kī

nahīñ hai tāqat-e-raftār lekin is kī hasrat hai

kahāñ par hai mirī manzil dikhā de shakl manzil kī

tirī bazm-e-tamannā bhī ajab bazm-e-tamannā hai

hazāroñ uTh ga.e lekin vahī raunaq hai mahfil kī

garebāñ chaak hone par bhī vahshat nā-mukammal hai

abhī hasrat hai mujh ko ai junūñ tauq-o-salāsil kī

mujhe shauq-e-shahādat le chalā hai aaj maqtal meñ

ilāhī baat rakhnā qatl-gah meñ mere qātil kī

na jaane kis ke jalve 'rāz' mujh ko yaad aate haiñ

ye kis ke dard kī dil meñ kasak hai ḳhair ho dil kī

qasam hai jaane wale tujh ko apne husn-e-kaamil ki

zara rudad-e-gham sunta bhi ja TuTe hue dil ki

KHudara rahm kar mujh par tu ai wahshat mere dil ki

kahan par le chali mujh ko dikha kar shakl manzil ki

hamein khoya hai qismat ne hamari la ke manzil par

na apna hosh tha hum ko KHabar thi kuchh na manzil ki

ajab kya tha unhen haalat pe meri rahm aa jata

agar rudad-e-gham sunte mere TuTe hue dil ki

nahin hai taqat-e-raftar lekin is ki hasrat hai

kahan par hai meri manzil dikha de shakl manzil ki

teri bazm-e-tamanna bhi ajab bazm-e-tamanna hai

hazaron uTh gae lekin wahi raunaq hai mahfil ki

gareban chaak hone par bhi wahshat na-mukammal hai

abhi hasrat hai mujh ko ai junun tauq-o-salasil ki

mujhe shauq-e-shahadat le chala hai aaj maqtal mein

ilahi baat rakhna qatl-gah mein mere qatil ki

na jaane kis ke jalwe 'raaz' mujh ko yaad aate hain

ye kis ke dard ki dil mein kasak hai KHair ho dil ki