qatl par bandh chuka wo but-e-gumrah miyan

qatl par bāñdh chukā vo but-e-gumrāh miyāñ

dekheñ ab kis kī taraf hote haiñ allāh miyāñ

naza.a meñ chashm ko dīdār se mahrūm na rakh

varna tā-hashr ye dekheñgī tirī raah miyāñ

tū jidhar chāhe udhar jā ki sahar se tā-shām

maiñ bhī saa.e kī tarah huuñ tire ham-rāh miyāñ

ham tirī chaah se chāheñge use bhī dil se

jis ko jī chāhe use shauq se tū chaah miyāñ

lekin itnā hai ki is chaah meñ dariyā haiñ ka.ī

aise aise ka.ī haiñ jin kī nahīñ thaah miyāñ

aage muḳhtār ho tum ham jo tumheñ chāhe haiñ

is sabab se tumheñ ham karte haiñ āgāh miyāñ

jab dam-e-naz.a na aayā vo sitamgar to 'nazīr'

mar gayā kah ke ye hasrat-zada ai vaah miyāñ

qatl par bandh chuka wo but-e-gumrah miyan

dekhen ab kis ki taraf hote hain allah miyan

naza mein chashm ko didar se mahrum na rakh

warna ta-hashr ye dekhengi teri rah miyan

tu jidhar chahe udhar ja ki sahar se ta-sham

main bhi sae ki tarah hun tere ham-rah miyan

hum teri chah se chahenge use bhi dil se

jis ko ji chahe use shauq se tu chah miyan

lekin itna hai ki is chah mein dariya hain kai

aise aise kai hain jin ki nahin thah miyan

aage muKHtar ho tum hum jo tumhein chahe hain

is sabab se tumhein hum karte hain aagah miyan

jab dam-e-naza na aaya wo sitamgar to 'nazir'

mar gaya kah ke ye hasrat-zada ai wah miyan