qayamat-shoKH aafat chulbula dil

qayāmat-shoḳh aafat chulbulā dil

mirā dil aur phir kaisā mirā dil

tire gesū se hai uljhā huā dil

bahut ab had se apnī baḌh gayā dil

tumhāre haath kā til ban gayā dil

tumheñ dhokā na de bahrūpiyā dil

ḳhudā ko jaan sauñpī dil butoñ ko

hamāre paas kyā thā jaan yā dil

mujhe dekhā to bole bazm meñ vo

na.e aa.e haiñ le kar ye nayā dil

tire gesū se ye bal kar rahā hai

kuchh ab aur zulfoñ vaalī baḌh chalā dil

hamārī jaan par ban ban ga.ī hai

na de dushman ko bhī aisā ḳhudā dil

na rang aa.e to us kī kyā ḳhatā hai

hinā ke saath kyuuñ saana gayā dil

manā.e kaun kis ko kaun samjhā.e

udhar ma.ashūq idhar bigḌā huā dil

ubhar kar daaġh laayā hai nayā rang

barābar dil ke hai ik dūsrā dil

mire haq meñ ye patthar kā banā thā

ḳhudāvandā butoñ se mil gayā dil

hasīnoñ ko samajhtā hī nahīñ kuchh

bahut bantā hai ḳhud meñ ḳhud-numā dil

mileñge hashr meñ dil lene vaale

milegā hashr meñ bichhḌā huā dil

rahegā yaad dil kā dil se milnā

milī duniyā mile ham tum milā dil

bahār aa.ī ki aa.ī vasl kī shaam

khile ġhunche khilī kaliyāñ khilā dil

vo nāvak ko nigāh-e-nāz samjhā

usī dhoke meñ to maarā paḌā dil

bahut hī lutf se un se milī aañkh

bahut hī lutf se un se milā dil

dil-e-marhūm aatā hai bahut yaad

'riyāz' aisā kahāñ ab chulbulā dil

qayamat-shoKH aafat chulbula dil

mera dil aur phir kaisa mera dil

tere gesu se hai uljha hua dil

bahut ab had se apni baDh gaya dil

tumhaare hath ka til ban gaya dil

tumhein dhoka na de bahrupiya dil

KHuda ko jaan saunpi dil buton ko

hamare pas kya tha jaan ya dil

mujhe dekha to bole bazm mein wo

nae aae hain le kar ye naya dil

tere gesu se ye bal kar raha hai

kuchh ab aur zulfon wali baDh chala dil

hamari jaan par ban ban gai hai

na de dushman ko bhi aisa KHuda dil

na rang aae to us ki kya KHata hai

hina ke sath kyun sana gaya dil

manae kaun kis ko kaun samjhae

udhar mashuq idhar bigDa hua dil

ubhar kar dagh laya hai naya rang

barabar dil ke hai ek dusra dil

mere haq mein ye patthar ka bana tha

KHudawanda buton se mil gaya dil

hasinon ko samajhta hi nahin kuchh

bahut banta hai KHud mein KHud-numa dil

milenge hashr mein dil lene wale

milega hashr mein bichhDa hua dil

rahega yaad dil ka dil se milna

mili duniya mile hum tum mila dil

bahaar aai ki aai wasl ki sham

khile ghunche khili kaliyan khila dil

wo nawak ko nigah-e-naz samjha

usi dhoke mein to mara paDa dil

bahut hi lutf se un se mili aankh

bahut hi lutf se un se mila dil

dil-e-marhum aata hai bahut yaad

'riyaz' aisa kahan ab chulbula dil