qudrat ne us mein rakkha hai itna sa KHair bhi

qudrat ne us meñ rakkhā hai itnā sā ḳhair bhī

ulfat ke saath rakhtā hai thoḌā sā bair bhī

gulshan ke saare phuul haiñ aamad ke muntazir

karnī to chāhiye tumheñ gulshan kī sair bhī

maanā ki ruuTh kar ke gayā hai vo mujh se par

mujh ko to māñgnī hai sadā us kī ḳhair bhī

us ne palaT ke dekhā nahīñ mujh ko ek baar

hālāñki samt us ke baḌhāyā thā pair bhī

lahroñ ke saath saath to chalte haiñ beshtar

lahroñ ke bar-ḳhilāf zarā der tair bhī

hāmil haiñ us kī zaat meñ kuchh aisī hī sifāt

tā'rīf jis kī karte haiñ apne bhī ġhair bhī

tum kah rahe the rah nahīñ sakte mire baġhair

dekho guzār dī hai tumhāre baġhair bhī

apnoñ ke vāste bhī du'ā kar sake na tum

maiñ ne to maañg lī mire dushman kī ḳhair bhī

'e'jāz' dekhne ko bachā kyā jahān meñ

ham ne haram bhī dekhā hai dekhā hai dair bhī

qudrat ne us mein rakkha hai itna sa KHair bhi

ulfat ke sath rakhta hai thoDa sa bair bhi

gulshan ke sare phul hain aamad ke muntazir

karni to chahiye tumhein gulshan ki sair bhi

mana ki ruTh kar ke gaya hai wo mujh se par

mujh ko to mangni hai sada us ki KHair bhi

us ne palaT ke dekha nahin mujh ko ek bar

haalanki samt us ke baDhaya tha pair bhi

lahron ke sath sath to chalte hain beshtar

lahron ke bar-KHilaf zara der tair bhi

hamil hain us ki zat mein kuchh aisi hi sifat

ta'rif jis ki karte hain apne bhi ghair bhi

tum kah rahe the rah nahin sakte mere baghair

dekho guzar di hai tumhaare baghair bhi

apnon ke waste bhi du'a kar sake na tum

main ne to mang li mere dushman ki KHair bhi

'e'jaz' dekhne ko bacha kya jahan mein

hum ne haram bhi dekha hai dekha hai dair bhi