rah-guzar ke patthar pani lagne lage

rāh-guzar ke patthar paanī lagne lage

lutf-e-safar kyā jab āsānī lagne lage

arz-o-samā kī gardish soch ke Dar jā.ūñ

paañv jamā luuñ maiñ vo ravānī lagne lage

maiñ ne jidhar bhī us ke havāle se dekhā

saare manzar us kī nishānī lagne lage

ik ik harf itnā dohrāyā phūloñ ne

us ke rang-o-bū kī kahānī lagne lage

ek kiran us ke āvezoñ se phūTī

aur dariyā sāhil sab dhānī lagne lage

jhāñk kar us kī āñkhoñ meñ dekhūñ to mujhe

kabhī bahār kabhī vīrānī lagne lage

kaise chhupā.ūñ dil ke zaḳhmoñ ko us se

aisī rafāqat kyā ki girānī lagne lage

itnī baasī nazroñ se mat dekh ki 'zeb'

do din meñ har chiiz purānī lagne lage

rah-guzar ke patthar pani lagne lage

lutf-e-safar kya jab aasani lagne lage

arz-o-sama ki gardish soch ke Dar jaun

panw jama lun main wo rawani lagne lage

main ne jidhar bhi us ke hawale se dekha

sare manzar us ki nishani lagne lage

ek ek harf itna dohraya phulon ne

us ke rang-o-bu ki kahani lagne lage

ek kiran us ke aawezon se phuTi

aur dariya sahil sab dhani lagne lage

jhank kar us ki aankhon mein dekhun to mujhe

kabhi bahaar kabhi virani lagne lage

kaise chhupaun dil ke zaKHmon ko us se

aisi rafaqat kya ki girani lagne lage

itni basi nazron se mat dekh ki 'zeb'

do din mein har chiz purani lagne lage