راہگزر کے پتھر پانی لگنے لگے

راہگزر کے پتھر پانی لگنے لگے

لطف سفر کیا جب آسانی لگنے لگے

ارض و سما کی گردش سوچ کے ڈر جاؤں

پاؤں جما لوں میں وہ روانی لگنے لگے

میں نے جدھر بھی اس کے حوالے سے دیکھا

سارے منظر اس کی نشانی لگنے لگے

اک اک حرف اتنا دہرایا پھولوں نے

اس کے رنگ و بو کی کہانی لگنے لگے

ایک کرن اس کے آویزوں سے پھوٹی

اور دریا ساحل سب دھانی لگنے لگے

جھانک کر اس کی آنکھوں میں دیکھوں تو مجھے

کبھی بہار کبھی ویرانی لگنے لگے

کیسے چھپاؤں دل کے زخموں کو اس سے

ایسی رفاقت کیا کہ گرانی لگنے لگے

اتنی باسی نظروں سے مت دیکھ کہ زیبؔ

دو دن میں ہر چیز پرانی لگنے لگے