rah par un ko laga lae to hain baaton mein

raah par un ko lagā laa.e to haiñ bātoñ meñ

aur khul jā.eñge do chaar mulāqātoñ meñ

abr-e-rahmat hī barastā nazar aaya zāhid

ḳhaak uḌte kabhī dekhī na ḳharābātoñ meñ

tumhīñ insāf se ye hazrat-e-nāseh kah do

lutf in bātoñ meñ aatā hai ki un bātoñ meñ

aisī taqrīr sunī thī na kabhī shoḳh-o-sharīr

terī āñkhoñ ke bhī fitne haiñ tirī bātoñ meñ

ahd-e-jamshed meñ thā lutf-e-mai-o-abr-o-havā

kab ye ma.ashūq the us vaqt kī barsātoñ meñ

bheje detā hai unheñ ishq matā-e-dil-o-jāñ

ek sarkār luTī jaatī hai sauġhātoñ meñ

vo ga.e din jo rahe yaad butoñ kī ai 'dāġh'

rāt-bhar ab to guzartī hai munājātoñ meñ

rah par un ko laga lae to hain baaton mein

aur khul jaenge do chaar mulaqaton mein

abr-e-rahmat hi barasta nazar aaya zahid

KHak uDte kabhi dekhi na KHarabaaton mein

tumhin insaf se ye hazrat-e-naseh kah do

lutf in baaton mein aata hai ki un baaton mein

aisi taqrir suni thi na kabhi shoKH-o-sharir

teri aankhon ke bhi fitne hain teri baaton mein

ahd-e-jamshed mein tha lutf-e-mai-o-abr-o-hawa

kab ye mashuq the us waqt ki barsaton mein

bheje deta hai unhen ishq mata-e-dil-o-jaan

ek sarkar luTi jati hai saughaton mein

wo gae din jo rahe yaad buton ki ai 'dagh'

raat-bhar ab to guzarti hai munajaton mein