raat ko ab bari kiya jae

raat ko ab barī kiyā jaa.e

ḳhvāb ko multavī kiyā jaa.e

ab junūñ hī hai āḳhirī chāra

Thiik hai phir vahī kiyā jaa.e

āḳhirī vaar rah gayā baaqī

āḳhirī vaar bhī kiyā jaa.e

vo mayassar to ho nahīñ saktā

kam se kam yaad hī kiyā jaa.e

zulf se sā.ebāñ banā do tum

dhuup ko chāñdnī kiyā jaa.e

ik sharāra to ho gayā raushan

ab ise raushnī kiyā jaa.e

tujh ko dekhūñ to dil meñ aatā hai

kufr tā-zindagī kiyā jaa.e

raat ko ab bari kiya jae

KHwab ko multawi kiya jae

ab junun hi hai aaKHiri chaara

Thik hai phir wahi kiya jae

aaKHiri war rah gaya baqi

aaKHiri war bhi kiya jae

wo mayassar to ho nahin sakta

kam se kam yaad hi kiya jae

zulf se saeban bana do tum

dhup ko chandni kiya jae

ek sharara to ho gaya raushan

ab ise raushni kiya jae

tujh ko dekhun to dil mein aata hai

kufr ta-zindagi kiya jae