raat ko darkar tha kuchh dastani rang ka

raat ko darkār thā kuchh dāstānī rang kā

ham charāġh-e-ḳhāmushī laa.e zabānī rang kā

us ne peshānī hameñ dī hai zamīnī rang kī

aur sajda chāhtā hai āsmānī rang kā

gehueñ-pan ne nikalvāyā thā jannat se hameñ

jān-e-man ab ke kareñge 'ishq dhānī rang kā

'ishq ne to merā chehra hī badal kar rakh diyā

aisā ā.īna dikhāyā us ne saanī rang kā

ham mohabbat karne vāloñ kī zideñ bhī haiñ 'ajīb

chāhiye ik vāqi'a lekin kahānī rang kā

shāyad ab uktā ga.e sahrā-navardī se ġhazāl

chāhte haiñ koī vīrāna makānī rang kā

'farhat-ehsās' us kī miTTī kī samā'at khil uThī

she'r jab maiñ ne sunāyā terā paanī rang kā

raat ko darkar tha kuchh dastani rang ka

hum charagh-e-KHamushi lae zabani rang ka

us ne peshani hamein di hai zamini rang ki

aur sajda chahta hai aasmani rang ka

gehuen-pan ne nikalwaya tha jannat se hamein

jaan-e-man ab ke karenge 'ishq dhani rang ka

'ishq ne to mera chehra hi badal kar rakh diya

aisa aaina dikhaya us ne sani rang ka

hum mohabbat karne walon ki ziden bhi hain 'ajib

chahiye ek waqi'a lekin kahani rang ka

shayad ab ukta gae sahra-nawardi se ghazal

chahte hain koi virana makani rang ka

'farhat-ehsas' us ki miTTi ki sama'at khil uThi

she'r jab main ne sunaya tera pani rang ka