رات کو درکار تھا کچھ داستانی رنگ کا

رات کو درکار تھا کچھ داستانی رنگ کا

ہم چراغ خامشی لائے زبانی رنگ کا

اس نے پیشانی ہمیں دی ہے زمینی رنگ کی

اور سجدہ چاہتا ہے آسمانی رنگ کا

گیہویں پن نے نکلوایا تھا جنت سے ہمیں

جان من اب کے کریں گے عشق دھانی رنگ کا

عشق نے تو میرا چہرہ ہی بدل کر رکھ دیا

ایسا آئینہ دکھایا اس نے سانی رنگ کا

ہم محبت کرنے والوں کی ضدیں بھی ہیں عجیب

چاہئے اک واقعہ لیکن کہانی رنگ کا

شاید اب اکتا گئے صحرا نوردی سے غزال

چاہتے ہیں کوئی ویرانہ مکانی رنگ کا

فرحت احساسؔ اس کی مٹی کی سماعت کھل اٹھی

شعر جب میں نے سنایا تیرا پانی رنگ کا