raat ko gahri nind mein aksar yun mahsus sa hota hai

raat ko gahrī niiñd meñ aksar yuuñ mahsūs sā hotā hai

mere kāran ghar meñ koī chupke-chupke rotā hai

bāhar ko bāhar nahīñ samjhā ghar ko ghar hī nahīñ jaanā

ham kyā jāneñ ghar bāhar se kaisā rishta hotā hai

yūñhī kabhī ham fikr-e-suḳhan meñ jhapkī sī le lete haiñ

jaise aadhī raat ga.e dariyā kā paanī sotā hai

jaisī bhī terī bāteñ thiiñ dil hī Thahrā hai fankār

kaise kaise motī chun kar kyā kyā haar pirotā hai

ḳhaar nikāleñ paañv se ham aur aage aage pheñkte jaa.eñ

phir kahte haiñ koī hamārī raah meñ kāñTe botā hai

bastī kī bastī par kaisī chhāp hai ik anhonī kī

kaun baḌā le jā ke bhañvar meñ apnī naav Dubotā hai

sar meñ jab ākāsh samā.e tab hī sant koī kahlā.e

jis ke man meñ bahe gangā vo jaltī ret pe sotā hai

ik puurā ghar-bār hai terā jis kā tū rasiyā bhī hai

phir ye tū ash'ār meñ kaise 'talḳh' akelā hotā hai

raat ko gahri nind mein aksar yun mahsus sa hota hai

mere karan ghar mein koi chupke-chupke rota hai

bahar ko bahar nahin samjha ghar ko ghar hi nahin jaana

hum kya jaanen ghar bahar se kaisa rishta hota hai

yunhi kabhi hum fikr-e-suKHan mein jhapki si le lete hain

jaise aadhi raat gae dariya ka pani sota hai

jaisi bhi teri baaten thin dil hi Thahra hai fankar

kaise kaise moti chun kar kya kya haar pirota hai

KHar nikalen panw se hum aur aage aage phenkte jaen

phir kahte hain koi hamari rah mein kanTe bota hai

basti ki basti par kaisi chhap hai ek anhoni ki

kaun baDa le ja ke bhanwar mein apni naw Dubota hai

sar mein jab aakash samae tab hi sant koi kahlae

jis ke man mein bahe ganga wo jalti ret pe sota hai

ek pura ghar-bar hai tera jis ka tu rasiya bhi hai

phir ye tu ash'ar mein kaise 'talKH' akela hota hai