raat mein bhes badal kar nahin aane wala

raat meñ bhes badal kar nahīñ aane vaalā

shāyad aisā koī rahbar nahīñ aane vaalā

ḳhuun se apne charāġhoñ ko jalānā hai hameñ

chāñd dhartī pe utar kar nahīñ aane vaalā

paḌh ke dekhe koī tārīḳh abābīloñ kī

haq pe ġhālib koī lashkar nahīñ aane vaalā

ab yahāñ uḌte haiñ har samt shikārī panchhī

ab yahāñ koī kabūtar nahīñ aane vaalā

ham to hālāt ke ḳhāmosh tamāshā.ī haiñ

dil meñ jo kuchh hai zabāñ par nahīñ aane vaalā

merā paiġhām mohabbat tirā sheva nafrat

tū mire qad ke barābar nahīñ aane vaalā

dil se niklā hai baḌī saḳhtiyāñ sah kar aañsū

dekhnā lauT ke ab ghar nahīñ aane vaalā

us kī yādoñ ke ujāle hī bahut haiñ ham ko

jaane vaalā to palaT kar nahīñ aane vaalā

koī dariyā hī tirī pyaas bujhā.egā 'vasīm'

kaam tere ye samundar nahīñ aane vaalā

raat mein bhes badal kar nahin aane wala

shayad aisa koi rahbar nahin aane wala

KHun se apne charaghon ko jalana hai hamein

chand dharti pe utar kar nahin aane wala

paDh ke dekhe koi tariKH ababilon ki

haq pe ghaalib koi lashkar nahin aane wala

ab yahan uDte hain har samt shikari panchhi

ab yahan koi kabutar nahin aane wala

hum to haalat ke KHamosh tamashai hain

dil mein jo kuchh hai zaban par nahin aane wala

mera paigham mohabbat tera shewa nafrat

tu mere qad ke barabar nahin aane wala

dil se nikla hai baDi saKHtiyan sah kar aansu

dekhna lauT ke ab ghar nahin aane wala

us ki yaadon ke ujale hi bahut hain hum ko

jaane wala to palaT kar nahin aane wala

koi dariya hi teri pyas bujhaega 'wasim'

kaam tere ye samundar nahin aane wala