raat tanhai be-qarari hai

raat tanhā.ī be-qarārī hai

aur vahī zindagī hamārī hai

shab-zada chāñd gum hai bādal meñ

āsmāñ kahkashāñ se 'aarī hai

vahshat-e-dil se rā.egānī tak

ik udāsī kā raqs jaarī hai

ek ġham thā jo be-irāda thā

ab to jo hai vo iḳhtiyārī hai

aañkh jugnū sī jagmagātī thī

dekh ab kaisī ashk-bārī hai

aas hai saañs ke ukhaḌne tak

aaj kī raat ham pe bhārī hai

haiñ lahū-rang ḳhvāb tā'bīreñ

aañkh dar aañkh zaḳhm kaarī hai

ghar ko lauTe nahīñ jigar-goshe

aur maaoñ kī āh-o-zārī hai

peḌ vīrāñ haiñ chahchahāhaT se

ik udāsī chaman pe taarī hai

kaise mumkin ki niiñd aa.e 'ġhazal'

yaad aur yaad bhī tumhārī hai

raat tanhai be-qarari hai

aur wahi zindagi hamari hai

shab-zada chand gum hai baadal mein

aasman kahkashan se 'ari hai

wahshat-e-dil se raegani tak

ek udasi ka raqs jari hai

ek gham tha jo be-irada tha

ab to jo hai wo iKHtiyari hai

aankh jugnu si jagmagati thi

dekh ab kaisi ashk-bari hai

aas hai sans ke ukhaDne tak

aaj ki raat hum pe bhaari hai

hain lahu-rang KHwab ta'biren

aankh dar aankh zaKHm kari hai

ghar ko lauTe nahin jigar-goshe

aur maon ki aah-o-zari hai

peD viran hain chahchahahaT se

ek udasi chaman pe tari hai

kaise mumkin ki nind aae 'ghazal'

yaad aur yaad bhi tumhaari hai