رات تنہائی بے قراری ہے

رات تنہائی بے قراری ہے

اور وہی زندگی ہماری ہے

شب زدہ چاند گم ہے بادل میں

آسماں کہکشاں سے عاری ہے

وحشت دل سے رائیگانی تک

اک اداسی کا رقص جاری ہے

ایک غم تھا جو بے ارادہ تھا

اب تو جو ہے وہ اختیاری ہے

آنکھ جگنو سی جگمگاتی تھی

دیکھ اب کیسی اشک باری ہے

آس ہے سانس کے اکھڑنے تک

آج کی رات ہم پہ بھاری ہے

ہیں لہو رنگ خواب تعبیریں

آنکھ در آنکھ زخم کاری ہے

گھر کو لوٹے نہیں جگر گوشے

اور ماؤں کی آہ و زاری ہے

پیڑ ویراں ہیں چہچہاہٹ سے

اک اداسی چمن پہ طاری ہے

کیسے ممکن کہ نیند آئے غزلؔ

یاد اور یاد بھی تمہاری ہے