raaz-e-dil late hain zaban tak hum

rāz-e-dil laate haiñ zabāñ tak ham

dukh bhareñ ai ḳhudā kahāñ tak ham

aur vo ham se khiñchte jaate haiñ

minnateñ karte haiñ jahāñ tak ham

na uḌā bāġhbāñ ki gulshan-e-dil

aur haiñ āmad-e-ḳhizāñ tak ham

aap ke lutf ne to qahr kiyā

ḳhuub the jaur-e-āsmāñ tak ham

āsmāñ tak gayā hai sail-e-sarishk

dil ko royā kareñ kahāñ tak ham

un kā aanā bhī ab nahīñ manzūr

jaan se tañg haiñ yahāñ tak ham

terā paiġhām bhī sunā deñge

ai 'hasan' pahuñcheñ to vahāñ tak ham

raaz-e-dil late hain zaban tak hum

dukh bharen ai KHuda kahan tak hum

aur wo hum se khinchte jate hain

minnaten karte hain jahan tak hum

na uDa baghban ki gulshan-e-dil

aur hain aamad-e-KHizan tak hum

aap ke lutf ne to qahr kiya

KHub the jaur-e-asman tak hum

aasman tak gaya hai sail-e-sarishk

dil ko roya karen kahan tak hum

un ka aana bhi ab nahin manzur

jaan se tang hain yahan tak hum

tera paigham bhi suna denge

ai 'hasan' pahunchen to wahan tak hum