rafaqaton ka bharam toD jaane wala nahin

rafāqatoñ kā bharam toḌ jaane vaalā nahīñ

muqāble meñ agar aayā tar-nivāla nahīñ

paḌī huī hai nasab qais se milāne kī

kisī ne dasht mukammal magar khañgālā nahīñ

yahāñ buland sadā.eñ lagā ġhubār uḌā

dayār-e-ishq hai tahzīb kā havāla nahīñ

hamāre ahd ke suqrāt maslahat-bīñ haiñ

kisī ke haath meñ bhī zahr kā pyālā nahīñ

safar meñ rahne se is ko qarār rahtā hai

ye zaḳhm dil kā hai paañv kā koī chhālā nahīñ

havā ke haath lagī ḳhushbūoñ zarā sun lo

sambhāle kaun agar phuul ne sambhālā nahīñ

ye jis ne rizq kī tañgī pe ḳhud-kushī kar lī

kahīñ samāj ne mil kar to maar Daalā nahīñ

kareñge yūñhī sadā intizār sāhil par

guhar tahoñ se samundar ne jo uchhālā nahīñ

ye ehtiyāt pasandī kahāñ se aa.ī hai

agar zabāñ pe koī maslahat kā taalā nahīñ

kahāniyāñ na tarāsheñ ḳhayālī duniyā kī

kahāñ jahān meñ tafrīq past-o-bālā nahīñ

ijāra-dāriyāñ qaa.em haiñ kis liye 'jāzib'

koī havāla agar mo'atabar havāla nahīñ

rafaqaton ka bharam toD jaane wala nahin

muqable mein agar aaya tar-niwala nahin

paDi hui hai nasab qais se milane ki

kisi ne dasht mukammal magar khangala nahin

yahan buland sadaen laga ghubar uDa

dayar-e-ishq hai tahzib ka hawala nahin

hamare ahd ke suqraat maslahat-bin hain

kisi ke hath mein bhi zahr ka pyala nahin

safar mein rahne se is ko qarar rahta hai

ye zaKHm dil ka hai panw ka koi chhaala nahin

hawa ke hath lagi KHushbuon zara sun lo

sambhaale kaun agar phul ne sambhaala nahin

ye jis ne rizq ki tangi pe KHud-kushi kar li

kahin samaj ne mil kar to mar Dala nahin

karenge yunhi sada intizar sahil par

guhar tahon se samundar ne jo uchhaala nahin

ye ehtiyat pasandi kahan se aai hai

agar zaban pe koi maslahat ka tala nahin

kahaniyan na tarashen KHayali duniya ki

kahan jahan mein tafriq past-o-baala nahin

ijara-dariyan qaem hain kis liye 'jazib'

koi hawala agar mo'atabar hawala nahin